Үндсэн хууль, Засгийн газрын тухай хуулийг үндэслэн Монгол Улсын Ерөнхий сайд Л.Оюун-Эрдэнэ Засгийн газрын зарим гишүүнийг томилох тухай Захирамжид гарын үсэг зурж, шинэ сайд нарыг өчигдөр /2023.01.05/ томилсон. Үүний дараагаар шинэ УИХ-ын чуулганд сайд нар тангаргаа өргөв.

Тодруулбал, 

• Эрүүл мэндийн сайдаар С.Чинзориг,
• Барилга, хот байгуулалтын сайдаар Ц.Даваасүрэн
• Боомтын сэргэлтийн сайдаар Х.Булгантуяа
• Шадар сайд бөгөөд Эдийн засаг, хөгжлийн сайдаар Ч.Хүрэлбаатар нар томилогдов. 

Мөн өчигдрийн Засгийн газрын хуралдаанаар Эрүүл мэндийн дэд сайдаар С.Энхболд, БОАЖ-ын дэд сайдаар М.Ганбаатар, Цахим хөгжил, харилцаа холбооны дэд сайдаар Ж.Эрхэмбаатар, Эдийн засгийн хөгжлийн дэд сайдаар Г.Түвдэндорж, Уул уурхай, хүнд үйлдвэрийн дэд сайдаар О.Цэндсүрэнг томилсон юм. 

Эрүүл мэндийн сайд С.Чинзориг:

1986 онд Монгол улсын их сургуулийг төлөвлөгч эдийн засагч мэргэжлээр төгссөн. 2014-2015 онд Засгийн газрын гишүүн, Хөдөлмөрийн сайд, 2016-2020 онд Монгол Улсын Их Хурлын гишүүн, 2016-2018 онд Тогтвортой хөгжлийн зорилгын дэд хорооны дарга, 2017 оноос Монгол Улсын Засгийн газрын гишүүн, Хөдөлмөр, нийгмийн хамгааллын сайд, 2020 оноос Монгол Улсын Их Хурлын гишүүнээр сонгогдон ажиллаж байна. 

Барилга, хот байгуулалтын сайдаар Ц.Даваасүрэн:

1989 онд ЗХУ-ын Харьков хотын Политехникийн дээд сургууль, 1994 онд Төрийн захиргаа, удирдлагын хөгжлийн институт Бизнесийн удирдлагийн менежер мэргэжлээр, 1998 онд Япон улсын Сайтомогийн их сургууль Эдийн засагч мэргэжлээр тус тус төгссөн. 2008-2012 онд Монгол Улсын Их Хурлын гишүүн, 2009-2010 онд Монгол Улсын Их Хурлын Төсвийн байнгын хорооны дарга, 2012-2016 онд Монгол Улсын Их Хурлын гишүүн, 2012-2014 онд Монгол Улсын Их Хурлын Төсвийн байнгын хорооны дарга, 2016-2020 Монгол Улсын Их Хурлын гишүүн, 2017 оноос Монгол Улсын Засгийн газрын гишүүн, Эрчим хүчний сайд, 2020 оноос Монгол Улсын Их Хурлын гишүүнээр сонгогдон ажиллаж байна. 

Боомтын сэргэлтийн сайдаар Х.Булгантуяа:

2006 онд БНХАУ-ын “Хуазонг” Шинжлэх ухаан технологийн их сургууль, эдийн засагч, 2008 онд АНУ-ын Иелийн Их сургууль, эдийн засагч, олон улсын эдийн засаг, хөгжлийн эдийн засгийн магистраар төгссөн. 2013-2016 онд МАН-ын Олон улсын харилцаа, намын зохион байгуулалт, хамтын ажиллагааны асуудал эрхэлсэн нарийн бичгийн дарга, Удирдах зөвлөлийн гишүүн, 2016-2020 онд Сангийн дэд сайд, 2020 оноос Монгол Улсын Их Хурлын гишүүнээр сонгогдон ажиллаж байна. 

Шадар сайд бөгөөд Эдийн засаг, хөгжлийн сайдаар Ч.Хүрэлбаатар:

1991 онд ОХУ-ын Ленинград хотын Санхүү эдийн засгийн дээд сургууль төлөвлөгөө, эдийн засагч мэргэжлээр, 1998 онд Австралийн Сидней Их сургуулийг эдийн засагч мэргэжлээр тус тус төгссөн.

2007-2008 онд Монгол Улсын Засгийн газрын гишүүн, Түлш эрчим хүчний сайд, 2008-2012 онд Монгол Улсын Их Хурлын гишүүн, 2008-2009 онд Монгол Улсын Их Хурлын Төсвийн байнгын хорооны дарга, 2009-2012 онд Монгол Улсын Засгийн газрын гишүүн, Монгол Улсын сайд, Засгийн газрын хэрэг эрхлэх газрын дарга, 2012-2016 онд Монгол Улсын Их Хурлын гишүүн, 2016-2020 Монгол Улсын Их Хурлын гишүүн, 2016-2017 онд Монгол Улсын Их Хурлын Төсвийн байнгын хорооны дарга, 2017 оноос Монгол Улсын Засгийн газрын гишүүн, Сангийн сайд, 2020 оноос Монгол Улсын Их Хурлын гишүүн, Монгол Улсын Засгийн газрын гишүүн, Сангийн сайдаар ажиллаж байна.

СҮХБААТАР ДҮҮРГИЙН МАН-ЫН ДАРГА М.ГАНБААТАР БОАЖЯ-НЫ ДЭД САЙД БОЛОВ

МАН-д олон жил зүтгэсэн ч тодорхой албан тушаалд очиж чаддагүй байсан М.Ганбаатарыг У.Хүрэлсүхийн Засгийн газрын үед “Тавантолгой түлш” ХХК-ийн захиралаар томилсон юм. Гэвч түлштэй холбоотой гомдол санал тасрахгүй байсан учраас түүнийг өөрийнх нь хүсэлтээр ажлаас нь чөлөөлж байв. Үүний дараа тэрбээр Сүхбаатар дүүргийн МАН-ын дарга болсон юм. Түүнийг 2024 оны сонгуульд нэр дэвших сонирхол тун өндөртэй нэгэн гэгддэг.

С.ЭНХБОЛД САЙДААС ДЭД САЙД РУУ "БУУВ"

У.Хүрэлсүхийн Засгийн газрын дан дээлтэй, мэргэжлийн сайд нарын нэг нь С.Энхболд байв. Түүний хувьд Улсын II-р эмнэлгийн даргаар ажиллаж байгаад Эрүүл мэндийн сайдаар томилогдсон бөгөөд Л.Оюун-Эрдэнийн Засгийн газрын бүтэц солигдоход түүнийг өөрчилж магадгүй гэсэн мэдээлэл байсан ч хэсэг хугацаанд суудалдаа үлдсэн дан дээлтэй сайд байв. Гэвч энэ удаад түүнийг сайдынх нь суудлаас "буулгаж", яамныхаа ажлыг мэддэг, мэргэжлийн гэж үзэж дэд сайдаар томилох шийдвэрийг өнөөдөр гаргав, МАН. С.Энхболдын хувьд Анагаах ухааны магистр,Хүний их эмч мэргэжилтэй. 2007-2019 он Улсын нэгдүгээр төв эмнэлэгт (УНТЭ) Дүрс оношилгооны төвийн дарга, 2019 оноос Улсын хоёрдугаар төв эмнэлэгийн (УХТЭ) захиралаар тус тус ажиллаж байсан юм.

ДЭД САЙД Г.ТҮВДЭНДОРЖ БУУРИА СЭЛГЭВ

Байгаль орчин, аялал жуулчлалын дэд сайд Г.Түвдэндорж 2022 оны нэгдүгээр сард томилогдож байв. Түүнээс өмнө Сангийн яамны Хөрөнгө оруулалтын газрын даргаар ажиллаж байсан юм. Олон Улсын худалдаа, эдийн засагч, АНУ-ын Беркли коллежийг бизнесийн удирдлагаар төгссөн түүнийг тус яамны дэд сайдаар очиход нь олон хүн гайхаж байсан ч мөн л ирэх сонгуульд өрсөлдөх хүмүүсийн тоонд багтаж байгаа учраас ийн дэд сайдаар томилогдсон гэх яриа ч гарч байв. Ийнхүү шинэчлэгдсэн Засгийн газар Эдийн засгийн хөгжлийн яаманд мэргэжлийн дэд сайдыг томилов. Г.Түвдэндорж 1998-2002 он, Худалдаа Үйлдвэрлэлийн Их Сургуулийг Олон улсын худалдаа, эдийн засагч мэргэжлээр бакалавр, 2002-2006 он, АНУ-ын Беркли коллежийг бизнесийн удирдлага, 2007-2016 он, хувийн хэвшилд ажилласан. 2017-2018 он, Сангийн яамны Нягтлан бодох бүртгэлийн бодлогын газрын дарга, 2018-2022 он, Сангийн яамны Төсвийн хөрөнгө оруулалтын газрын дарга, 2022 оноос Байгаль орчин, аялал жуулчлалын яамны дэд сайд, Улсад 14 жил ажиллажээ.

ГЕНСЕКИЙН ЗӨВЛӨХ Ж.ЭРХЭМБААТАР ЦАХИМ ХӨГЖЛИЙН ЯАМНЫ ДЭД САЙД БОЛОВ

Олон нийт Ж.Эрхэмбаатарыг хуульч гэдгээр нь андахгүй. Тэрбээр  АНУ-ын Калифорнийн их сургуулийн Беркли дэх салбарыг хуулийн чиглэлээр төгссөн нэгэн бөгөөд 2020 оны УИХ-ын сонгуульд Хан-Уул дүүрэгт бие даан өрсөлдөж байсан нэгэн.  Сонгуулийн дараагаас МАН-тай ойр болж, өнгөрсөн оны хоёрдугаар сард Хөгжлийн банкны дэд захирлаар томилогдож байв. Гэвч шинэ хууль гарч, дэд сайдууд байхгүй болсон учраас тэрбээр албан тушаалаасаа чөлөөлөгдөж, МАН-ын генсек Д.Амарбаясгалангийн зөвлөхөөр ажиллаж байгаад ийн дэд сайдаар "дэвшив".

МАХН-ЫН КВОТООР О.ЦЭНДСҮРЭН ДЭД САЙД БОЛОВ

МАН-ын Удирдах зөвлөлийн хуралдаанаар хийгдсэн бас нэг дэд сайдын томилгоо нь Уул уурхай, хүнд үйлдвэрийн дэд сайдаар О.Цэндсүрэнг томилов. Түүний талаар тодорхой мэдээлэл байхгүй ч өмнө нь МАХН-ын гишүүн байсан бөгөөд Хан-Уул дүүрэгт нэр дэвшиж байжээ.  Энэ удаагийн Удирдах зөвлөлийн хуралдаанаар томилгоо хийхдээ МАХН-ын квот хэмээн О.Цэндсүрэнг томилсон байна. Хариуцлагатай уул уурхайн чиглэлээр мэргэшсэн хүн гэж түүнийг томилж байгаа аж.