Монгол Улсын Боловсролын сайд П.Наранбаяр өчигдөр буюу 2025 оны гуравдугаар сарын 27-нд УИХ-ын гишүүн Б.Найдалаатай маргалдаж, улмаар бие махбодын хохирол амссан хэрэг гарлаа. Энэхүү үйл явдал Төрийн ордонд болсон бөгөөд П.Наранбаяр сайд нүүрэндээ хоёр оёдол тавиулах шаардлагатай болжээ. Гэвч энэ хэрэг зөвхөн хувийн маргаанаар хязгаарлагдахгүй, улс төрийн болон ёс зүйн ноцтой асуудлуудыг хөндсөнөөр онцлог юм. Үүний зэрэгцээ, сүүлийн үед хэвлэлээр гарсан мэдээллээр П.Наранбаяр Ж.Галбадрах гишүүний Шинэ Монгол сургуульд 1.2 тэрбум төгрөгийн санхүүжилт олгосон нь шүүмжлэлийн бай болоод байна.

Төрийн ордонд өчигдөр болсон тус хэргийн талаар олон нийтийн сүлжээ болон хэвлэл мэдээллийн хэрэгслээр мэдээлэл тархаж эхэлсэн. П.Наранбаяр сайд болон Б.Найдалаа гишүүн хоорондоо маргалдаж, улмаар нэгнийгээ хохироосон гэх мэдээлэл бий. Цагдаагийн байгууллага уг хэргийг шалгаж эхэлсэн ч одоогоор тодорхой дүгнэлт, хэргийн шалтгааны талаар албан ёсны мэдээлэл гараагүй байна.

Эндээс юу тодорхой харагдаж байна вэ гэвэл, энэ хэрэг явдал зөвхөн хувийн шинжтэй байж таарахгүй. Учир нь өнгөрөгч мягмар гарагт болсон Боловсрол, соёл, шинжлэх ухаан, спортын байнгын хорооны хуралдааны үеэр МАН-ын УИХ-ын гишүүд П.Наранбаяр сайдад ноцтой анхааруулга өгсөн юм. Тэд Боловсролын салбарыг ХҮН намын суурийг бэхжүүлэх хэрэгсэл болгож, багш эрхлэгч нарыг "ХҮН намд элс, үгүй бол халагд" хэмээн сүрдүүлж байна гэж мэдэгджээ. Харин П.Наранбаяр сайд "Энэ талаар мэдэхгүй, ийм зүйл байхгүй" хэмээн үгүйсгэсэн. Гэсэн ч энэ маргаан Б.Найдалаатай болсон хэрэгт нөлөөлсөн байж болзошгүй гэсэн таамаг бий. 

П.Наранбаяр сайдын талаарх шүүмжлэл зөвхөн уг хэрэг явдлаар хязгаарлагдахгүй. Сүүлийн үед хэвлэлээр гарсан мэдээллээр тэрээр Ж.Галбадрах гишүүний Шинэ Монгол сургуульд 1.2 тэрбум төгрөгийн санхүүжилт олгосон нь олон нийтийн дургүйцлийг төрүүлжээ. Шинэ Монгол сургууль нь Ж.Галбадрах гишүүний үүсгэн байгуулсан хувийн сургууль бөгөөд улс төрийн нөлөөг ашиглан ийм их хэмжээний төсвийн хөрөнгө авсан нь ашиг сонирхлын зөрчил гэж харагдаж байна.

Боловсролын сайд П.Наранбаяр нь Шинэ Монгол сургуулийн гүйцэтгэх захирлаар буюу Ж.Галбадрах гишүүнтэй хамтран ажиллаж байсан эртний хамтрагчид гэдгийг олон нийт сайн мэднэ. 

Бид энэ талаар эргэн баримт түшин мэдээлэх болно.