Японы автомашин үйлдвэрлэгч “Toyota Motor” компанийн хүндэт тэргүүн Тойода Шоичиро мягмар гарагт зүрхний дутагдлын улмаас 97 насандаа таалал төгсжээ.

“Toyota” компанийг үүсгэн байгуулагч Тойода Киичирогийн ууган хүү тэрбээр 1952 онд автомашин үйлдвэрлэгч тус компанид ажлын гараагаа эхлүүлж байв

Т.Шоичиро 1982 оноос “Toyota Motor” компанийн ерөнхийлөгчийн албыг хашиж эхэлсэн бөгөөд АНУ-ын Кентукки муж улс, Канад, Их Британид үйлдвэрүүдээ байгуулжээ. Тэрбээр компаниа дэлхийн хамгийн том автомашин үйлдвэрлэгчдийн нэг болгон өргөжүүлсэн хүндтэй эрхэм юм.

1992 онд компанийнхаа тэргүүн болсны дараа Т.Шоичиро Японы бизнесийн салбарт түлхүү анхаарч, 1994 оноос эхлэн дөрвөн жилийн хугацаанд Японы Бизнесийн холбооны тэргүүнээр ажиллаж байжээ.

Улмаар 1999 онд “Toyota” компанийн хүндэт тэргүүн болж, менежментийн тэргүүн эгнээнээс нэрээ татсан бөгөөд 2009 онд компанийн ерөнхийлөгч болсон хүү Тойода Акиогоо дэмжсээр ирсэн байна.