БНСУ дахь Монгол Улсын ЭСЯ-ны ажилтан согтууруулах ундаа хэрэглэсэн үедээ жолоо барьж яваад цагдаа нарт баригдсан талаар “Yonhap” агентлаг мэдээлжээ.

Сөүл хотын Ёндүнпо дүүргийн цагдаагийн хэлтэс өнөөдөр /2023.10.11/ мэдээлснээр Монгол Улсын ЭСЯ-ны харьяа дипломат ажилтан А нь даваа гарагийн /2023.10.10/ 09:00 минутын орчим согтуугаар жолоо барьж яваад саатуулагдсан байна.

Тухайн үед А нь гэнэт хурд авч, тоормосолж байсан тул түүнтэй ойролцоо жолоо барьж явсан хүмүүс цагдаад мэдэгджээ. Цагдаагийн алба хаагч түүнийг зогсоон, үлээлгэн шалгах гэсэн ч А нь дипломат халдашгүй эрхтэй хэмээн үлээхээс татгалзсан аж.

Үүний дараа Монголын ЭСЯ-ны ажилчид хүрэлцэн ирж А-г авч явсан байна. Цагдаагийн байгууллага уг хэргийг дипломат халдашгүй эрхийн дагуу хаах төлөвлөөгөөтэй байгаа гэж “Yonhap” агентлаг мэдээлжээ.