Засгийн газрын өнөөдрийн хуралдаанаар УИХ-д өргөн мэдүүлэхээр тогтсон Эрүүгийн тухай хуульд нэмэлт өөрчлөлт оруулах тухай хуулийн төсөлд тусгасан согтуугаар тээврийн хэрэгсэл жолоодохтой холбоотой өөрчлөлтийг ХЗДХ-ийн сайд Б.Энхбаяр танилцууллаа. 

Тус өөрчлөлтөд согтуугаар тээврийн хэрэгсэл жолоодсон зөрчлийг эрүүгийн хэрэгт тооцох бөгөөд дараах дөрвөн ялын сонголтыг хэрэглэх юм байна. Тодруулбал, согтуугаар тээврийн хэрэгсэл жолоодвол тээврийн хэрэслийг жолоодох эрхийг 1-3 жил хүртэл хугацаагаар хасаж, 450,000-2,700,000 төгрөгөөр торгоно. Эсхүл, 240-720 цаг нийтэд тустай ажил хийлгэх юм байна. Эсвэл зургаан сараас нэг жил хүртэл хугацаагаар зорчих эрхийг хязгаарлах, эсхүл, зургаан сараас нэг жил хүртэл хугацаагаар хорих ял шийтгэхээр боловсруулжээ. Түүнчлэн согтуугаар тээврийн хэрэгсэл жолоодож ял шийтгэгдсэн этгээд дахин энэ зөрчлөө гаргавал тус үйлдлийг хүндрүүлэх бүрэлдэхүүнд тооцно. Ингэснээр, согтуугаар жолоо барьж ял шийтгэл эдэлсэн этгээд дахин зөрчлөө давтвал 2 жилийн хугацаагаар хорих ялыг нэмж тооцох юм байна. Энэ үйлдлийг давтан гаргасаар байвал ялын бодлого чангарсаар байх болно гэдгийг ХЗДХ-ийн сайд Б.Энхбаяр танилцууллаа. 

Энэ оны эхний найман сарын байдлаар, 25,392 хэрэг бүртгэгдснээс 3289 буюу 13 хувь нь согтуугаар үйлдэгдсэн гэмт хэрэг байна. 2022 онд согтуугаар үйлдэгдсэн зам тээврийн осол болон хүний амь нас хохирон тохиолдол буурсан байна.