Нийслэлийн суурьшлын бүсэд зарим иргэн малаа удаа дараа оруулсаар байна. Мал аж ахуй эрхлэхийг хориглосон бүсэд мал орж ирснээр зам тээврийн осол гарах, ногоон байгууламж, авто зам, нийтийн эзэмшлийн гудамж, талбайг бохирдуулах, малын гоц халдварт өвчин гарах эрсдэл бий.

Иймд Мал аж ахуй эрхлэхийг хориглосон бүсэд нэвтэрсэн малыг түр хадгалах, түүнтэй холбогдон гарсан зардлыг нөхөн төлүүлэх журмыг НИТХ-аар хэлэлцэн, баталсан юм. Уг журмын хэрэгжилтийг хангахаар гуравдугаар сарын 9, 10-ны өдөр хориглосон бүсээс мал гаргах арга хэмжээг зохион байгуулж, 3051 малыг илрүүлэн хашаалж, эздэд нь хүлээлгэн өгчээ. Тодруулбал, Баянзүрх дүүргийн иргэн Д.Баярсайханы эзэмшлийн 305, Сонгинохайрхан дүүргийн иргэн С.Баяраагийн 172, Б.Төмөрчөдөрийн 120, Б.Дондогдоржийн 300, Д.Жанчивын 200, Чингэлтэй дүүргийн иргэн Д.Пропуск, Ш.Хүдэрчулуун нарын 120 адуу удаа дараа мал аж ахуй эрхлэхийг хориглосон бүсэд бэлчиж байсныг НЗДТГ-ын ХМОНХХ мэдээллээ.

Нийслэлийн Хүнс, хөдөө аж ахуйн газрын дарга Х.Эрдэнэбилэг ярихдаа, “Дээрх иргэд олон тооны адууг хориглосон бүс рүү удаа дараа оруулж байгаа тул цагдаагийн байгууллагаас арга хэмжээ авч байна. Суурьшлын бүсэд мал бэлчсэнээр иргэдэд эрсдэл учруулж байгаа. Иймд мал бүхий иргэд үүрэг, хариуцлагаа ухамсарлан, хууль, журмаа сахин биелүүлж, хориглосон бүс рүү мал оруулахгүй байхад анхаарна уу” хэмээв.

Улаанбаатар хотын мал аж ахуй эрхлэхийг зөвшөөрсөн бүсэд 2023 оны мал тооллогоор 427184 толгой мал тоолжээ.