Ардын намын жагсаалтын өнгө төрх аятайхан болсон. Ярих юм алга. Нийгмийн төлөөллөө бүрэн хангаж. Харин энэ гоё нүүр царайны цаана УИХ-д 16 жил суучихсан, өөртөө л өмч хөрөнгө, эрх мэдэл наагаад байхаас иргэн арддаа, эх орондоо юу ч бүтээдэггүй цөөнгүй нөхөд халхавчлагдан тойрог руу очиж нэр дэвшихээр болжээ. Эдгээр нөхдийг ард түмэн минь, ялгаж салгаж, ойлгож мэдэрч байгаа нь тодорхой биз ээ.

Амлалтыг нь нэхэхээр л тодорхой хариу дүгнэлт гараад ирж байгаа юм. Ардын намын хорин оны амлалтын хоёрхон заалтыг хэлье. Засгийн газарт дөрөвхөн давхар дээлтэн байна аа гэсэн. Гэвч энэ УИХ-аар хоёр ч удаа Үндсэн хуулийн өөрчлөлт хийлгүүлж, эдүгээ давхар дээлтэй хорин хэдэн сайд ажиллаж, хэрэг дээрээ лаахайдан эзэрхийлж сууна. Үүнийг ард түмэн мэдэж байгаа. Бөөлжсөө долоосныг.

Үүнийг өнөөх л 12-20 жил УИХ-д суусан, өөртөө л үйлдвэр завод барьсан, мэдээлэл, эрх мэдлийн дээр суугаагаараа бүхнийг амжуулсан нөхөд л хийсэн. Идэж ууснаа "нуухын" тулд дахин дахин гишүүн болсон. Одоо харин тэдгээр төрөөс төрсөн тэрбумтнууд, албан тушаалаа авлигажуулсан нөхдүүдийг тойрогт очиход нь ард түмэн сонгохгүй байх хэрэгтэй.

Тэдний хөрөнгө орлогын мэдүүлгийг үзэхэд, улсдаа станц хэд хэдээр нь барьчих хүмүүс атлаа, үүнийг хийдэггүй. Ардын намын бас нэгэн амлалт бий. Дарханы үйлдвэр, технологийн паркийг барьж, жилдээ 10 сая малын гаралтай түүхий эдийг боловсруулна гэсэн. Одоо болтол тэрийгээ барьсангүй. Нэхий жалганд, гэдэс толгой үрэгдсээр, буянт малын шим үнэгүйдсээр. Тойрогт дэвшихээр очсон, том том улс төрчдөөс ард түмэн минь энэ мэт амлалтыг нь асууж, одоо л тэднээс салах цаг нь шүү. Тэд улс орныг үнэндээ өөд татсангүй ээ.

Өөрийгөө л өөд нь татлаа. УИХ-ын гишүүний суудлыг сайдтай ижилсүүлэн, хавсран унаж өөрийгөө өргөлөө. Одоо болно. МАН-ын дарга жагсаалтандаа шижигнэсэн залуусыг оруулж, эл дол болсон хууччуулыг тойрог руу нь ард түмэндээ өөрийгөө үнэлүүл гээд илгээчихлээ. Энэ дээр нь иргэд сонгогчид та бид хэрсүү хандаж авлига албан тушаалын хэрэг, ЖДҮ, Хөгжлийн банк, Нүүрсний хулгай, Боловсролын зээлийн санд нэр холбогдогсдыг аль намаас нь үл хамааран дахиж сонгохгүй байх нь Монголын төрийг авлигачдаас цэвэрлэх, төрд шинэ салхи савир оруулах боломжийг бий болгох юм шүү гэдгийг АНХААРЧ СОНГОЛТОО хийцгээе.

З. ГАРЬД

AMLALT.MN