УИХ-ын чуулганы өнөөдрийн хуралдаанаар Засгийн газраас өргөн мэдүүлсэн Төрийн хэмнэлтийн тухай хуулийн төслийг хэлэлцэх үеэр УИХ-ын гишүүн Т.Доржханд гишүүдийг жорлон ярилаа хэмээн шүүмжилж, чуулганы танхимыг орхин гарлаа. 

Чуулганы хуралдааны үеэр УИХ-ын гишүүн М.Оюунчимэг: "Нийслэлийн хүн амын 70 гаруй хувийг бүрдүүлдэг гэр хорооллын иргэдийг нүхэн жорлон, яндангаас салгаж, амьдрах нөхцөлийг сайжруулахыг зорьж байгаа. Гэтэл төсвийн болон орон нутгийн төсвийн хөрөнгө оруулалтгүйгээр уг асуудлыг шийдэх ямар ч боломжгүй. Тиймээс гишүүдээс энэхүү саналыг дэмжиж өгөхийг хүсэж байна" гэсэн юм. 

Сангийн сайд Б.Жавхлан: "Төрийн хэмнэлтийн тухай хуулийг бараг буцааж татахаар болж байна. Ийм хэмнэлтийн хууль гаргаад ч хэрэггүй болж байх шиг байна. М.Оюунчимэг гишүүний хэлж байгаагаар улсын төсвөөр айлын хашаанд жорлон бариад тухайн айлд нь бэлэглээд яваад байх юм байна л даа. Тийм байж болохгүй. Улсын төсвөөр тийм хөрөнгө оруулалт хийж болохгүй. Тэгэхээр М.Оюунчимэг гишүүн та энэ саналаа буцааж татах нь зүйтэй" гэлээ. 

Төсвийн байнгын хорооны дарга Ч.Хүрэлбаатар: Засгийн газраас оруулж ирсэн их олон асуудлыг унагаагаад байна. Гэр хороолол руу явж байгаа дэд бүтцийг улсын төсвөөр хийх нь нээлттэй. Харин айлын хашаан доторхыг төсвөөс битгий хий гэдэг зүйлийг хуульд тусгасан. Тэгвэл улсын төсвөөс айлын хашаанд жорлон бариад өглөө. Гэр нь өөрийнх нь, жорлон нь улсынх байх нь. Ийм зүйл хийж болохгүй.

УИХ-ын гишүүн Т.Доржханд:  "Бодлого ярьдаг парламенттай яаж болох вэ гэж байхад жорлон морлон яриад суух юм. Агуулга, концепцоо, зарчмын юмаа ойлгохгүй юм. Эдийн засгийн онолоо судал л даа. Олон улсынхаа түвшинг мэдэж байж шийдвэрээ гарга л даа. Ийм ажил хэрэгч бус, мэдлэггүй байж бологүй ээ. УИХ-ын гишүүд нь Засгийн газрынхаа хэмнэлтийн бодлогыг дэмжихгүй, баг болж байгаад жонглордож байгаад л бүгдийг нь унагаж байна. Энэ хэмнэлтийн бодлого чинь бүтэхгүй юм байна" хэмээгээд чуулганы танхимыг орхин гарав.

УИХ-ын дарга Г.Занданшатар: "Хуулийн төслийг ойлгомжгүй, салаа утгатай бичсэнээс болж гишүүдийн дунд үл ойлголцож гарч байна. Хэмнэлт ярьж байхад айлын жорлон руу орно гэдэг чинь юу гэсэн үг вэ. Популист популист гэхэд энэ арай хэтэрнэ шүү. Энэ асуудлыг эцсийн найруулга дээр ойлгомжтой болгох хэрэгтэй. Айл өрхийн цэвэрлэх байгууламжийг айлын жорлон гэж ойлгохгүй шүү" гэлээ.