Засгийн газрын өнөөдрийн ээлжит хуралдаанаар, Хөгжлийн банкны чанаргүй зээлтэй холбоотой асуудлыг хэлэлцсэн талаар Сангийн сайд Б.Жавхлан мэдээлэв. 

Тус банканд Монгол банкнаас 2019 онд хийсэн шалгалтаар нийт 812 тэрбум төгрөгийн зээлийн алдагдлын сан байгуулах ёстой гэсэн акт тавьсан. Гэсэн хэдий ч сан байгуулагдах гүйлгээ хийгдээгүйг Сангийн сайд мэдээллийн үеэр тэмдэглэв. Цаашдаа Хөгжлийн банк хэвийн үйл ажиллагаа явуулахад эдгээр чанаргүй зээлийг яаралтай төлүүлэх зайлшгүй тулсан нөхцөл байдалд ирсэн байна. 

Сангийн сайд Б.Жавхлан: "2023 онд төлөх ёстой хоёр томоохон бонд байгаа. Нэг нь Евро бонд буюу Сэргэн мандалт нэртэй бонд. Энэ нь 2023 оны аравдугаар сард төлөх ёстой 500 сая долларын бонд. Мөн арванхоёрдугаар сарын 25-нд төлөх 725 тэрбум төгрөгийн Самурай бонд. Энэ хоёр бондоос онцгой анхаарах ёстой нь Самурай бонд. Учир нь энэ Засгийн газрын баталгаатай. Энэ чанаргүй зээлийг яаралтай төлүүлэхгүй бол бондын өрийг татвар төлөгчдийн мөнгөөр төлөх эрсдэл үүсээд байна. Тийм учраас зээлийг төлүүлэх ажилд Засгийн газар шуурхай орсон.

Засгийн газраас чанаргүй зээлийн асуудлаар ажиллахад хуулийн байгууллагын оролцоо их чухал байгааг онцолж, шүүхийн шийдвэр гүйцэтгэх байгууллага, прокурор, АТГ, цагдаа зэрэг хүчний байгууллагын оролцоог нэмэгдүүлэхээр болсон. Үүнтэй холбогдуулан Хууль, дотоод хэргийн сайдаар ахлуулсан ажлын хэсэгт хүчний байгууллагын төлөөллийг оролцуулан өр барагдуулах ажлуудыг зохион байгуулахаар боллоо" гэлээ.