Монголын Хөрөнгийн бирж нь Засгийн газрын өнгөрсөн оны 12 дугаар сарын 14-ний 466 дугаар тогтоолоор баталсан “Экспортод гаргах нүүрсний нээлттэй цахим арилжааны журам”-ын хэрэгжилтийн бэлтгэл ажлыг ханган ажиллаж байна.

Бэлтгэл ажлын хүрээнд нүүрсний цахим худалдаанд оролцогчдыг comex.mse.mn вэб платформд бүртгэж эхэлжээ. Энэ нь нүүрсний спот гэрээний дуудлага арилжааг зохион байгуулах хянах, хуваарилах үндсэн үүрэг бүхий систем юм гэдгийг Монголын Хөрөнгийн биржээс мэдээлж байна. Үндсэн үйл ажиллагаа нь:

• худалдан авахаар санал гаргагчийг бүртгэх,
• арилжих бүтээгдэхүүнийг бүртгэх,
• үнэ өрсөлдүүлэх юм.

Системийн давуу тал нь худалдан авагч өөрөө дуудлага арилжаанд шууд оролцох боломжийг бүрдүүлжээ. Оролцогч талууд болон системийн хяналтын хэрэглэгчид захиалгын явцыг системээр шууд хянах боломжийг олгосноор арилжааг нээлттэй, ил тод, шударга зохион байгуулах нөхцөлийг бүрдүүлжээ.

Нүүрсний спот гэрээний дуудлага арилжааны уг системд худалдан авагч, худалдагч, арилжаа зохион байгуулагч, арилжааны хяналт хариуцсан нэгж нэвтрэх бүрэн боломжтой. Худалдан авагч байршил хамаарахгүйгээр интернет орчинд вэб хандалтаар нэвтэрч:

• захиалга оруулах,
• үнэ хаялцах,
• худалдагч дуудлага арилжааны явц хянах юм.

Арилжаа зохион байгуулагч нь арилжааны туршид арилжааг удирдахаас гадна арилжааны өмнөх, дараах бүх үеийг удирдах эрхтэй аж.

Экспортод гаргах нүүрсний нээлттэй цахим арилжаанд худалдан авах санал гаргагч нь http://comex.mse.mn/ цахим системд бүртгүүлэхэд дараах баримт бичгийг бүрдүүлэх нь. Үүнд:

• Хуулийн этгээдийн улсын бүртгэлийн гэрчилгээний хуулбар;
• Оршин суугаа улсын татвар төлөгчийн гэрчилгээ, татвар төлөгчийн дугаар;
• Харилцагч банкны дансны тодорхойлолт;
• Гадаад хэл дээрх баримт бичгийг англи хэл дээрх албан ёсны орчуулгын хамт.

Монголын Хөрөнгийн бирж нь системд бүртгүүлсэн худалдан авах санал гаргагчдын материалыг хянаж үзээд, шаардлагатай бол тодруулга авахаар холбогдох ба системд материал бүрэн оруулсныг үндэслэн дуудлага арилжаанд оролцох эрхийг олгох аж.