АНУ-ын Төрийн нарийн бичгийн дарга Энтони Блинкен, АНУ-ын Тэргүүн хатагтай Жилл Байден нар жил бүр хамтран зохион байгуулдаг Олон улсын эмэгтэйчүүдийн хатан зоригийн шагнал гардуулах ёслол Улаанбаатарын цагаар энэ сарын 9-ний үүрээр 03 цагт Цагаан ордонд боллоо.

Энэ үеэр Бригадын генерал Г.Болор бусад улсын 10 бүсгүйн хамт Олон улсын эмэгтэйчүүдийн хатан зоригийн 2023 оны шагналыг гардаж авав. Арван долоо дахь жилдээ зохион байгуулж буй Төрийн нарийн бичгийн даргын нэрэмжит Олон улсын эмэгтэйчүүдийн хатан зоригийн шагналыг энх тайван, шударга ёс, хүний эрх, жендэрийн тэнцвэртэй, эрх тэгш байдлыг хангах, эмэгтэйчүүдийн эрх мэдлийг хамгаалах үйлсэд өөрийн амь насыг эрсдэлд оруулан байж онцгой хатан зориг, манлайллыг үзүүлсэн дэлхийн өнцөг булан бүр дэх эмэгтэйчүүдэд олгодог.

АНУ-ын дипломат төлөөлөгчийн газрууд өөрсдийн суугаа орноос тус бүр нэг эмэгтэйг нэр дэвшүүлдэг бөгөөд Төрийн департаментын ахлах албан тушаалтнууд эцсийн шатны шалгаруулалтыг хийж баталдаг аж. Төрийн департаментаас 2007 оноос хойш дэлхийн 80 гаруй орны 180 гаруй эмэгтэйд энэхүү шагналыг гардуулсан бөгөөд энэ жил Бригадын генерал Г.Болор Олон улсын эмэгтэйчүүдийн хатан зоригийн шагналыг Монгол Улсаас хүртэж буй анхны эмэгтэй болж байгаа юм.