Улс төрийн намууд 2024 оны сонгуульд хэрхэн оролцохоо төлөвлөж, бэлтгэл ажлаа чимээгүйхэн хангасаар байна. Үүнтэй зэрэгцэн улс төрийн хүчнүүд сонгуулийн тухай хуулийг холимог тогтолцоотой болгох хуулийн төслөө хүргүүлээд байгаа билээ. Намуудын хувьд Сонгууль тухай хуулийг ирэх зургадугаар сард батлаж, бүх зүйлсийг тодорхой болгох ёстой гэсэн байр суурьтай байгаа юм. Хэдийгээр  олон нийтийн дунд сонгуулийг хойшлуулах магадлалтай гэсэн жиг жуг яваа ч улс төрийн хүчнүүдийн хувьд, сонгуулийг цаг хугацаанд нь,  хуваарийн дагуу зохион байгуулна гэсэн төлөвлөгөөтэйгөөр, сонгуульд сойх гишүүдээ дор бүрнээ яриад эхэлжээ. 

 Энэ саналыг АН-ын дарга Лу.Гантөмөр тавьсан бололтой. Учир нь тэрээр хэдхэн хоногийн өмнө “Сонгуулийн холимог системийг дэмжиж, нийгэмд хүлээн зөвшөөрөгдөх хүнийг жагсаалтад оруулна” хэмээн мэдэгдээд байсан юм. Энэхүү жагсаалтандаа нэгэн үе хамтран зүтгэж байсан сэтгүүлч Ч.Лодойсамбууг Ардчилсан намаас Хан-Уул дүүрэгт нэр дэвшүүлэх саналыг дэвшүүлсэн бололтой.

"Улаан бал" нэвтрүүлгийн сэтгүүлч Ч.Лодойсамбуугийн хувьд хэвлэл мэдээллийн салбарт 15 орчим жил ажиллаж буй туршлагатай сэтгүүлчдийн нэг. Энэ хугацаанд гэрэл зургийн чиглэлд илүүтэй гаршсан, нийгмийн асуудалд мэдрэмжтэй ханддаг нэгэн хэмээн үнэлэгдсэн. Хурц өнцөгэй олон шилдэг гэрэл зургаар олон нийтэд танил болсон байдаг. Дээрээс нь  2012-2016 онд БСШУЯ-нд Лу.Гантөмөр сайдын удирдлага дор Хэвлэлийн албанд нь 4 жил ажиллаж байсан, ажил хэргийн хамтрагчид билээ.

Тэрээр 1987 онд Улаанбаатар хотод төрсөн. 2005-2009 онд “Хэвлэлийн хүрээлэн”-ийн дэргэдэх “Сэтгүүлч” коллежид суралцаж төгссөн. 

2007-2010 онд үндэсний өдөр тутмын “Зууны мэдээ” сонинд гэрэл зургийн сурвалжлагчаар ажиллаж байсан.  2009 онд “Өнөөгийн төр” гэрэл зургаараа “Оны шилдэг гэрэл зураг” Гран при шагнал хүртсэн. 2010-2011 онд “Shuud.mn” сайтад гэрэл зургийн сурвалжлагч, 2012 онд “Шууд” телевизийн нэвтрүүлэгч, мэдээний албаны сурвалжлагчаар ажиллаж байсан. 2012-2016 онд БСШУЯ-нд Лу.Гантөмөр сайдын удирдлага дор Хэвлэлийн албанд нь 4 жил ажиллаж байсан. 2018 оноос хойш ТВ6 телевизэд сэтгүүлчээр ажиллаж, “Улаан бал” нэвтрүүлгийг санаачлан хөтөлж, одоо тус нэвтрүүлгээрээ NTV телевизэд харьяалагдаж байна.  Хэрэв тэрээр ирэх сонгуульд АН-аас нэр дэвших нь үнэн бол УИХ-д иргэдийг төлөөлөн орж, улстөрчдийн зөв бурууг “Улаанбал”-аар дүгнэх бололтой.