Монгол Улсад төрийн айлчлал хийж буй Бүгд Найрамдах Польш Улсын Ерөнхийлөгч Анджей Дудагийн айлчлалын хүрээнд өнөөдөр Монгол Улсад тус улс Элчин сайдын яамаа нээлээ.

Монгол Улс, БНПУ-ын хооронд 1950 оны дөрөвдүгээр сарын 14-нд дипломат харилцаа тогтоосон юм. Тус улс 1960 оноос Улаанбаатарт ЭСЯ-аа нээн ажиллуулж байгаад санхүүгийн бэрхшээлийн улмаас 1995 оны есдүгээр сард Улаанбаатар дахь ЭСЯ-аа хаасан аж. Харин 1999 онд ЭСЯ-аа сэргээн нээж, "Дипломат 95" орон сууцны байрт байрлаж байв.

Польшийн тал ЭСЯ-аа 2009 онд дахин хааж, Бээжингээс манай улсыг хавсран суух болсон. Харин 2015 оноос  Варшаваас Монголыг хариуцаж ажиллах Элчин сайдыг томилсон. Польшийн Засгийн газар Монгол Улсад Элчин сайдын яамаа нээх шийдвэрийг 2021 оны нэгдүгээр сарын 15-нд гаргаж, байнгын үйл ажиллагаагаа эхлүүлсэн.  

Энэ удаагийн айлчлалын хүрээнд Элчин сайдын яамандаа Консулын хэлтэс ажиллуулах Монголын талын хүсэлтийг БНПУ 2024 оноос ажил хэрэг болгохоор тохиролцлоо. Ингэснээр монгол иргэд БНПУ-д зорчих визээ Монгол Улс дахь Бүгд Найрамдах Чех Улсын болон БНХАУ дахь тус улсын Элчин сайдын яамнаас  авах шаардлагагүй болох гэнэ.

Харин манай улсын ЭСЯ Варшавт 1959 оноос тасралтгүй ажиллаж байна.