Ерөнхийлөгчийн ивээл дор зохион байгуулж буй “Хүнсний хангамж, аюулгүй байдал- Газар тариалан” үндэсний чуулган хоёр дахь өдрөө төмс, хүнсний ногоо, зоорийн аж ахуй, жимс, жимсгэнийн аж ахуй эрхлэгчдийн улсын зөвлөгөөнөөр үргэлжилж байна. 

Жимс жимсгэнэ нь тариалснаас хойш үр жимсээ өгтөл 3-аас доошгүй жил шаарддаг, олон жилийн хөдөлмөр, хөрөнгө санхүүжилт, шинжлэх ухааны үндэслэл бүхий арга технологитой тул төрийн дэмжлэг, урт хугацаат хөрөнгө оруулалт шаардлагатай салбар гэдэгт анхаарч байгаа-г ХХААХҮ-ийн сайд З.Мэндсайхан онцлов. Тэрбээр, “Засгийн газраас 2010-2016 онд “Чацаргана” үндэсний хөтөлбөр хэрэгжүүлж чацарганын тариалалтыг нэмэх ажлыг орон даяар өрнүүлж, 2.5 сая ширхэг чацарганы суулгацыг жимс жимсгэний тариалан эрхлэгчдэд хөнгөлөлттэй зээл олгосны зэрэгцээ, суулгац үржүүлэг, судалгаа шинжилгээ, боловсруулах үйлдвэр, бүтээгдэхүүн үйлдвэрлэлийг хөгжүүлэх, экспортыг нэмэхэд олон талаар дэмжсэн, цаашид экспортыг дэмжихэд бүх талаар дэмжиж хамран ажиллана" хэмээн тодотголоо.

Энэ үйл ажиллагаатай зэрэгцэн төмс, хүнсний ногоо, зоорийн аж ахуй эрхлэгчдийн улсын зөвлөгөөн боллоо. Зөвлөгөөний үеэр салбарын сайд төмс, хүнсний ногооны үйлдвэрлэлийн өнөөгийн байдал, хэрэгжүүлэх үйл ажиллагааг танилцуулсан бол бусад илтгэгч дэлхийн хүн амын хүнсний хангамж, зохистой хэрэглээ, газар тариалангийн мэдээллийн цахим систем, мөшгөх тогтолцоо, хүнсний ногооны сорт сонгох, таримлын сэлгэн тариалалтад анхаарах асуудал сэдвээр илтгэл тавьжээ.
Манай улсад 2021 оны байдлаар 338 аж ахуйн нэгж, 2511 иргэн жимс жимсгэнийн тариалан эрхэлж жимст цэцэрлэгийн талбай 6686 га-д хүрч, хураан авсан жимсний ургац түүхэндээ анх удаа 3760 тонн болжээ. Энэ нь 2009 оныхоос жимс жимсгэнийн талбай 4.4, хураан авсан ургац 9.8 дахин нэмэгдсэн үр дүн аж. Гэвч хураасан ургац нь физиологийн нормоор тооцоход хүн амын жилийн хэрэгцээний 2 хүрэхгүй хувийг дотоодын үйлдвэрлэлээр хангаж, жил бүр 20-24 мянган тонн жимс импортоор авч байгааг ХХААХҮЯ мэдээлэв.

Тус яамнаас “Тэрбум мод” хөдөлгөөний хүрээнд жимс жимсгэнийн талбайг 13.5 мянган га-гаар нэмж 20 мянган га-д хүргэх үүний тулд 24 сая ширхэг жимс жимсгэнийн мод тариалах, 21.8 мянган км тариалангийн талбайд ойн зурвас байгуулах, 330 сум, 22 аймаг, нийслэлд агро-ойн аж ахуй байгуулж нийт 128.2 сая ширхэг мод тариалахаар төлөвлөжээ.

Жимс жимсгэнийн хувьд чацаргана, үхэр нүдний суулгацыг дотооддоо үйлдвэрлэж байгаа ч алим, чавга, интоор зэрэг Монголд тариалах боломжтой бага тархацтай бусад жимс жимсгэний суулгацын 95 гаруй хувийг импортоор авч байгаа аж.

Европын холбооны  дэмжлэг, санхүүжилт, хамтын ажиллагааны үр дүнд 2022 оны 1 дүгээр сард "Увсын чацаргана"-ыг Монголоос Европын холбоонд "Газар зүйн заалттай бүтээгдэхүүн"-ээр баталгаажуулж гэрчилгээ олгосноор экспорт нэмэгдэх боломж бүрдээд байна.