УИХ-ын чуулганы өнөөдрийн нэгдсэн хуралдаанаар Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуульд нэмэлт, өөрчлөлт оруулах тухай хуулийн төслийг хэлэлцэх үеэр МАН-ын бүлэг ажлын тав хоногийн завсарлага авлаа.

Улсын төсвийн хөрөнгө оруулалтаар хэрэгжих төслийн төсөвт өртгийг хуулиар өөрчлөн баталсан бол гэрээний үнийг нэг удаа нэмэх боломжтой байхаар төсөлд тусгасан байна. Мөн УИХ-аас баталсан хөгжлийн төслийн жагсаалтад багтсан төсөлтэй холбогдуулан тендер шалгаруулалтыг хялбаршуулах, шаардагдах санхүүжилтийн 30-аас доош хувийг төрийн өмчит, төрийн өмчийн оролцоотой хуулийн этгээдээс санхүүжүүлэх тохиолдолд уг хуульд хамаарахгүй байхаар заажээ. Түүнчлэн гүйцэтгэлийн баталгаа, гэрээний үнэ 5 хувь байсныг 3 хувь, тендерийн баталгаа 2 хувь байсныг 0.5 хувь, зүгшрүүлэх, тохируулах хугацааны барьцаа 5-10 хувь байсныг 5 хувь байхаар тогтоож, барьцааны хугацааг 4 жил байсныг 1 жил, тендерийг 30 хоногт зохион байгуулдаг байсныг ажлын 15 хоногт шийдвэр гаргахаар хуулийн төсөлд тусгасныг Сангийн сайд танилцуулсан юм.

Танилцуулгын дараа 20 орчим гишүүн асуулт асууж, үг хэллээ. Тухайлбал, УИХ-ын гишүүн Н.Наранбаатар уг хуулийн төсөл нь ойрын хугацаанд хэрэгжүүлэх томоохон төслүүдтэй холбоотой хэмээгээд нийт хэдэн төсөл хэрэгжүүлэхээр төлөвлөснийг тодруулав. Шинэ сэргэлтийн бодлогын хүрээнд УИХ-ын 108 дугаар тогтоолоор “Хөгжлийн” хэмээх зургаан багцын 92 төсөл хэрэгжүүлэхээр баталсан гэдгийг Сангийн сайд хэллээ.

УИХ-ын гишүүн Х.Болорчулуун Сангийн яам тендерийг үзэмжээрээ шалгаруулдаг гэсэн асуудал гэсэн гомдол компаниуд гаргадаг хэмээн шүүмжлэв. Харин УИХ-ын гишүүн Г.Тэмүүлэн,”Төр 2015 оноос хойш нийтдээ 15 их наяд төгрөгийн тендер зарласан. Үүнээс 2.3 их наяд төгрөгийн тендерийн баталгаа, урьдчилгаа төлбөрийн баталгаа, гүйцэтгэлийн баталгааг арилжааны банкуудад төвлөрүүлсэн. Энэ бол аж ахуй нэгжүүдэд ямар их хэмжээний дарамт очдог вэ гэдгийн жишээ. Үүнийг өөрчлөх цаг болсон” гэлээ.

Хэлэлцүүлгийн үеэр УИХ дахь МАН-ын бүлгийн дарга, УИХ-ын гишүүн Д.Тогтохсүрэн, “Уг хуулийн төслийн талаар гишүүд өөр өөр байр суурь илэрхийж байна. Тиймээс гишүүдэд нэгдсэн мэдээлэл өгөх үүднээс МАН-ын бүлэг ажлын тав хоногийн завсарлага авах хүсэлтэй байна” гэлээ. Энэ дагуу УИХ-ын дарга Г.Занданшатар тус бүлэгт ажлын тав хоногийн завсарлага өгөв.

Чуулганаар Үйлдвэрлэл, технологийн паркийн эрх зүйн байдлын тухай хуулийн шинэчилсэн найруулгын төслийг хэлэлцэж байна.