УИХ-ын намрын чуулган өнөөдөр хаалтын хуралдаанаа хийж байна. Энэ үеэр УИХ-ын гишүүн, Монгол Улсын сайд, Улаанбаатар хотын авто замын түгжрэлийг бууруулах үндэсний хорооны дарга Б.Дэлгэрсайхан дугаарын хязгаарлалтыг зогсоох болон бусад асуудлаар мэдээлэл өглөө. 

Тэрбээр, "Дугаарын хязгаарлалтыг зогсооно. Тэгэхгүй бол оюутан сурагчдын хичээл эхлэхээс гадна цагаан сар удахгүй болно. Үүнтэй холбоотойгоор иргэдийн амьдрал ахуй хэцүү болно" гэлээ. Мөн тэрээр цаашид хотын төвд өндөр барилга бариулахгүй байх агуулга бүхий хуулийн төсөл өргөн барихаар төлөвлөж буйгаа дуулгалаа. Энэ нь Улаанбаатар хотын авто замын түгжрэлийг бууруулахад сайн талтайг онцолсон юм. Энэ хүрээнд Сэлбэ дэд төвийн барилгуудыг зургаан давхар байхаар төлөвлөжээ. 

Мөн тэрбээр, нийтийн тээврийн автобусны жолооч нарын цалинг 1000 ам.долларт хүргэх болсныг дуулгав. Энэ талаар тэрбээр, "Нийслэлийн Засаг дарга бид хоёр автобусны жолооч нарын цалинг нэмэх асуудлаар тохиролцсон байсан учраас өмнө нь 1000 ам.долларын цалинг амлаж буйгаа зарласан. Харин тэд автобус жолоодох үедээ тамхи татахгүй, шүлсээ хаяхгүй, гар утсаар ярихгүй. Цаашлаад жолооч цагаан бээлийтэй, малгайтай байх зэргээр хувцаслалтаа жигдрүүлнэ. Микрофоноор зорчигчдод буудлыг зарлан хэлэх, багтахгүй бол дараагийн автобусыг хүлээхийг зөвлөх зэргээр ажиллана. Хувь хүний соёлын харилцаанд сургах ажил ч хийхээр төлөвлөж байгаа" хэмээв.