УИХ-ын дэд дарга Л.Мөнхбаатар Монгол Улсад айлчилж буй Бүгд Найрамдах Ардчилсан Лаос Ард Улсын Үндэсний Ассамблейн дэд дарга Сүнтон Сайяажактай өнөөдөр уулзлаа.

БНАЛАУ-ын Үндэсний Ассамблейн дэд даргын айлчлал нь энэ онд хоёр улсын хооронд хэрэгжиж буй анхны өндөр түвшний айлчлал гэдгийг Л.Мөнхбаатар тэмдэглээд, парламент хоорондын хамтын ажиллагааг өргөжүүлэн бэхжүүлэхэд чухал түлхэц болно гэдэгт итгэлтэй байгаагаа илэрхийлэв. Тэрбээр, өнгөрсөн он хоёр улсын харилцаа, хамтын ажиллагааны түүхэн жил боллоо. Монгол Улсын Ерөнхийлөгч 18 жилийн дараа Лаос улсад төрийн айлчлал хийж, БНАЛАУ-ын Үндэсний Ассамблейн дарга 11 жилийн дараа Монгол Улсад албан ёсны айлчлал хийсэн. Эдгээр айлчлал нь хоёр улсын харилцааны түүхэн шинэ хуудсыг нээж, бидний өвөг дээдсийн тогтоосон ахан дүүсийн найрсаг харилцааг улам бататгасан хэмээн онцоллоо. УИХ-ын дэд дарга Монгол Улс Үндсэн хуульдаа өөрчлөлт оруулан УИХ-ын гишүүдийн тоог 126 болгон нэмснийг дурдаад, УИХ-ын чуулганы хуралдааны танхимыг шинэчлэхэд үнэтэй хувь нэмэр оруулж, хоёр улсын харилцааны найрамдлын бэлгэ тэмдэг болсон улаан модон сандал, ширээг нэмж бэлэглэсэнд талархал илэрхийлжээ.

БНАЛАУ-ын Үндэсний Ассамблейн дэд дарга Сүнтон Сайяажак, “Энэ удаагийн айлчлал хоёр улсын парламент хоорондын хамтын ажиллагааг өргөжүүлэн хөгжүүлэхэд чухал үүрэг гүйцэтгэнэ хэмээн итгэж байна. Монгол Улсын Ерөнхийлөгч У.Хүрэлсүхийн БНАЛУ-д хийсэн төрийн айлчлал нь хоёр улсын шинэ жарны түүхэнд тодоор бичигдэх үйл явдал болсон. Төрийн айлчлалын дүнгээр талууд Засгийн газар хоорондын хэлэлцээр, байгууллага хоорондын санамж бичиг зэрэг хоёр улсын эрх зүйн үндэс суурийг бэхжүүлэхэд ач холбогдолтой баримт бичгүүдийг байгуулсан нь хамтын ажиллагааг эдийн засгийн агуулгаар баяжуулах, аялал жуулчлал, тээвэр, логистик, хөдөө аж ахуй, боловсрол, эрүүл мэнд зэрэг салбарын хамтын ажиллагааг гүнзгийрүүлэхэд чухал хувь нэмэр оруулна гэдэгт итгэлтэй байна” гэв.

УИХ-ын дэд дарга Л.Мөнхбаатар хоёр улсын улс төрийн харилцааг бэхжүүлж, харилцааны эрх зүйн орчинг бүрдүүлэхэд хууль тогтоох дээд байгууллага хоорондын хамтын ажиллагаа, хэлхээ холбоо чухал үүрэг гүйцэтгэдгийг тэмдэглэлээ. Монгол, Лаосын харилцааны чухал механизмуудын нэг болох Парламентын бүлгүүдийн ажил хэрэгч уулзалт, ойр дотно хамтын ажиллагааг дэмжих, Парламентын бүлгийн төлөөлөгчдийг харилцан солилцох замаар хууль тогтоогчдын дэмжлэг авах нь уламжлалт харилцааг бэхжүүлэх нэг үндэс суурь болох юм. Хоёр улс Парламентын бүлэг, Засгийн газар хоорондын комисс, Гадаад харилцааны яамд хоорондын зөвлөлдөх уулзалт зэрэг хамтын ажиллагаа, яриа хэлэлцээний олон механизмтай. Цаашид энэ механизмуудаа ашиглан харилцаа, хамтын ажиллагаагаа улам бүр хөгжүүлэхийн төлөө байна хэмээлээ.

Хатагтай Сүнтон Сайяажак, Монгол, Лаосын харилцааны чухал механизм болох Засгийн газар хоорондын комиссын XII хуралдааныг 2024 онд Вьентьян хотноо зохион байгуулна, энэ хуралдаан хоёр орны харилцаа, хамтын ажиллагааг хөгжүүлэхэд чухал үүрэг гүйцэтгэнэ гэдэгт эргэлзэхгүй байна хэмээсэн.

Уулзалтын үеэр эдийн засаг, хөдөө аж ахуй, худалдаа, аялал жуулчлал, боловсролын салбарт хамтран ажиллах боломжийн талаар санал солилцсоны дараа БНАЛАУ-ын Үндэсний Ассамблейгаас Монгол УИХ-д бэлэглэх улаан модон тавилгыг хүлээлгэн өгөх, хүлээн авах протоколд УИХ-ын Тамгын газрын дэд дарга Ц.Батбаатар, БНАЛАУ-ын Үндэсний Ассамблейн Ерөнхий нарийн бичгийн даргын орлогч Сингкам Вунгпачан нар гарын үсэг зурсныг УИХ-ын Хэвлэл мэдээлэл, олон нийттэй харилцах газраас мэдээллээ.