Америкийн Нэгдсэн Улсаас Монгол улсад суугаа онц бөгөөд бүрэн эрхт элчин сайд ноён Майкл Стэнли Клечески, Эдийн засгийн ажилтан, Хоёрдугаар нарийн бичгийн дарга Лорен Ховис нар Ай Си Ти Групп ХК-ийн төв оффисоор өнөөдөр зочилж, Ай Си Ти Группийн ТУЗ-ийн дарга Г.Лхамсүрэн, үүсгэн байгуулагч А.Баттамир болон Хамтын ажиллагаа, Маркетинг хариуцсан захирал Б.Тамир нартай уулзаж, хамтын ажиллагааны талаар санал солилцлоо.

Ай Си Ти Групп ХК-ийн ТУЗ-ийн дарга Г.Лхамсүрэн “АНУ-ын Элчин сайд, ноён Майкл Стэнли Клеческийг зочлон ирсэнд талархаж буйгаа илэрхийлээд Монгол улсын цахим, суурь системүүдийг 53 охин болон бүрэлдэхүүн компаниудын хамтаар бүтээн бий болгож буй талаараа танилцуулж цаашид Элчин сайдын яамтай хамтран ажиллах, АНУ-ын мэдээллийн технологийн компаниудтай хамтын ажиллагаа тогтоохоор ярилцсан” юм.

Үүний дараа Элчин сайд, ноён Майкл Стэнли Клечески Ай Си Ти оффистой танилцаж, Монгол улсад мэдээллийн технологийн групп компани хэрхэн үйл ажиллагаагаа явуулж буй талаар чөлөөт ярилцлага өрнүүллээ.

Айлчлан ирсэн зочид төлөөлөгчдөд Ай Си Ти Группийн зүгээс дотоодын шинэ бүтээгдэхүүн болох nft.trade.mn маркет дээр байрлаж буй Ардын зураач, Төрийн шагналт, Урлагийн гавьяат зүтгэлтэн Өндөр Гэгээн Занабазарын шагналт Ш.Чимэддоржийн бүтээл "Салхины хээ #15" бүтээлийн NFT хувилбарын эзэмших эрхийг дурсгал болгон бэлэглэлээ.