Монгол Улсын Үндсэн хуульд нэмэлт, өөрчлөлт оруулах шаардлагыг АН, ХҮН, ИЗНН, Үнэн ба Зөв нам, МҮАН-ын удирдлагууд Ерөнхийлөгч, УИХ-ын дарга, Г.Занданшатар нарт өнөөдөр хүргүүллээ.

Шаардлагыг хүргүүлэхийн өмнө дээрх намуудын удирдлагууд Төрийн ордонд хэвлэлийн хурал хийлээ. Энэ үеэр УИХ-ын гишүүн Т.Доржханд, “Монгол Улсын эдийн засгийн нөхцөл байдал хүнд байгаа. Засгийн газраас өнөөдөр Монгол Улсын 2022 оны төсвийн тодотголыг хэлэлцэж байна. Одоогоос 10 гаруй хоногийн өмнө залуус жагсаал зохион байгуулж, улс төрийн намуудад саналаа хүргүүлсэн. Энэ бүхнээс дүгнэж үзэхэд бид өнгөрсөн 30 жилийн алдаа, оноогоо хэлэлцэн, асуудлыг сууриар нь шийдвэрлэх шаардлагатай байна. Сонгуулийн тогтолцоог өөрчлөх, Үндэсний аюулгүй байдлыг бэхжүүлэх, төсвийн хэмнэлт хийх, УИХ-ын гишүүний тоог 150-215 болгох асуудлыг Үндсэн хуулийн нэмэлт, өөрчлөлтөд тусгах нь зөв” гэлээ.

Монгол Улсад үүсээд буй улс төр, эдийн засгийн хямралын суурь нь сонгуулийн можаритар тогтолцоо гэдгийг УИХ-ын гишүүн С.Одонтуяа хэвлэлийн хурлын үеэр онцолсон юм. УИХ-ын 2020 оны сонгуулийн үеэр санал өгсөн нийт иргэдийн 42 хувь нь МАН-д санал өгсөн байхад УИХ-ын гишүүдийн 83 хувийг тус намын гишүүн бүрдүүлж байгаа. Нэг нам хэт давамгайлсан тогтолцоо улс төрийн хямралд оруулж байна хэмээн үзэж буйгаа тэрбээр дурдаад, Үндсэн хуульд нэмэлт  оруулж, сонгуулийн тогтолцоог өөрчлөх нь энэ бүх асуудлыг сууриар нь шийдвэрлэх боломж хэмээв.

МҮАН-ын дарга Б.Цогтгэрэл, “2019 онд Үндсэн хуульд нэмэлт, өөрчлөлт оруулсан. Үндсэн хууль зөвхөн тусгаар тогтнолын баталгаа бус хөгжил дэвшлийн баримт бичиг байх ёстой гэж үзэж байгаа. Тиймээс Үндсэн хуульд эдийн засгийн бүтэн бүлэг оруулах ёстой гэсэн санаачилга гаргаж байсан ч үр дүнд хүрээгүй. Одоо үндэсний мөнгөн тэмдэгтийн ханш, инфляцитай холбоотой зохицуулалтыг Үндсэн хуульд оруулах ёстой. Түүнчлэн 2019 онд Үндсэн хуульд орон нутагт намчирхалыг сааруулах тухай бүхэл бүтэн бүлэг оруулахаар ярьж байсан ч батлагдаагүй. Орон нутагт намчирхал хэрээс хэтэрч, жижиг дунд үйлдвэрлэлийг хөгжүүлэх, ажлын байр бий болгох асуудалд чөдөр тушаа болж байна. Тиймээс намчирхал, талцлыг үгүй болгох, эдийн засгаа бэхжүүлэхтэй холбоотой заалтыг Үндсэн хуульд зайлшгүй оруулах ёстой” гэлээ.

Улс төрийн 10 гаруй нам энэ оны нэгдүгээр сарын 13-нд Үндсэн хуульд нэмэлт, өөрчлөлт оруулах нь зөв хэмээн үзэж, албан бичгээ боловсруулж, Ерөнхийлөгч, Ерөнхий сайд, УИХ-ын дарга нарт хүргүүлсэн байна. Улмаар Үндсэн хуульд нэмэлт, өөрчлөлт оруулах асуудлыг УИХ-ын хаврын ээлжит чуулганы хугацаанд шийдвэрлэх хэрэгтэй хэмээн үзэж, шаардлага хүргүүлж буй аж.