Монгол Улсад улс төрийн орогнол хүсэн ирсэн Халимаг иргэн өнөөдөр өөрийн хүсэлтээр өөр улс руу хилээр гарсан хэмээн Гадаад харилцааны сайд Б.Батцэцэг мэдээлэв. 

Ойрын өдрүүдэд цахим орчинд Монгол Улсад улс төрийн орогнол хүсэж буй халимаг иргэний тухай мэдээлэл хөвөрсөн. Тодруулбал, Тухайн иргэн Чингис хаан нисэх буудалд ирсэн бөгөөд гадаад паспортын хугацаа дууссан гэх шалтгаанаар хилийн зурваст тав хонож байгаа талаар цахим орчинд мэдэгдсэн юм. Энэ талаар Гадаад харилцааны сайд Б.Батцэцэг, "Тухайн иргэн хоёрдугаар сарын 23-ны өдөр Хүннү эйр компанийн онгоцоор нисэж ирээд, хилийн зурваст зургаа хоносон. Өөрийн хүсэлтээр өнөөдөр Монголоос гарсан. Хувийн мэдээллээ нууцлахыг хүссэн учраас задруулахгүй. Манай улсаас өөрийн хүсэлтээр явсан учир ямар улс руу гарсан тухай мэдээлэх эрхгүй” гэв.

Мөн тэрээр албан ёсны улс төрийн орогнол хүсээгүй гэдгийг хэлсэн юм. Тэгвэл Батыр Боромангнаев гэх тухайн иргэн Монгол Улсын Ерөнхийлөгчид хүсэлт гаргажээ. Уг хүсэлтдээ,

"Миний бие 1965 оны нэгдүгээр сарын 3 төрсөн, ОХУын иргэн Боромангнаев Батыр Батырович, халимаг монгол.

1987 онд Ломоносовын нэрэмжит Москвагийн их сургуулийн түүхийн ангийг төгссөн. 1988 онд Халимаг улсад анх удаа бүрэн дунд сургуульд монгол, халимагийн түүхийг зааж эхэлсэн. 2012 онд Элиста хотод Монгол клуб үндэслэн байгуулагчдын нэг. Тэр жилдээ Монгол улстай Халимаг улсын хамтарсан үйл ажиллагааны гэрээний төслийг боловсруулж Халимаг БНУ-ын тэргүүн А. Орловт гардуулж өгсөн. Мөн хамтын ажиллагааны чиглэлүүдийг тодорхойлж өгч байсан. Сүүлийн 20 жилийн турш Хүннү, Сяньби болон бусад эртний нүүдэлчдийн түүхийг Халимагт таниулах үйл ажиллагаа явуулж ирсэн. 2017 онд Монгол улсад ирж монголын түүхчидтэй уулзаж монголын түүхэн эх газраар аяласан. Сыма Цяний зохиол дотроос бидний өвөг дээдэс монголчуудын төр засгийн түүх Модуний үеээс 1000 жилийн өмнө олж тогтоосон. Монголын төрт уламжлал 2230 жил биш 3230 жилийн түүхтэй билээ!  

Оросын орос биш угсаатануудын эрхийн төлөө тэмцэж ОХУ-д байхад миний амь нас, эрүүл мэнд, эрх чөлөөнд аюул учирч байсан тул надад Монгол Улсад улс төрийн оргонол олгохыг хүсэж байна" гэжээ.