Төрийн худалдан авах ажиллагааны газар (ТХААГ)-аас мэдээлж буйгаар төрийн худалдан авалтад өнгөрсөн онд 10.1 их наяд төгрөгийн тендер шалгаруулалт зарлажээ. Үүний санхүүжүүлэх дүн нь 3 орчим их наяд төгрөг гарч байв. ЕБС-ийн сурагчдын “Үдийн цай” хөтөлбөрт гэхэд өнгөрсөн жил давхардсан тоогоор 66 тэрбум төгрөгийн тендер зарлаж, хамгийн багадаа жилд 1 тэрбум төгрөгийн хүнсний бүтээгдэхүүнийг худалдан авчээ.

Энэ талаар Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал” хөдөлгөөний хүрээнд өнөөдөр болсон "Үндэсний үйлдвэрлэлийг төрийн худалдан авах ажиллагаагаар дэмжих нь" нээлттэй хэлэлцүүлэг дээр ТХААГ-ын дарга Ц.Батзул мэдээллээ.

Хүнсэн дээр өнөөдрийн байдлаар 20 гаруй төрлийн бүтээгдэхүүнийг төрийн худалдан авалтад шаардлага хангасан гэдэг байдлаар журамлаад байна. Үүнийг нэмэлт байдлаар нийлүүлэлтийг хэрхэн нэмэгдүүлж сайжруулах талаар хэлэлцэж буйг Монгол Улсын Ерөнхийлөгчийн Эдийн засгийн бодлогын зөвлөх Б.Даваадалай хэлэлцүүлгийн нээлт дээр мэдээлэв. Тэрбээр, дотоодын хүнсний бүтээгдэхүүний тоог нэмэгдүүлж, чанарыг сайжруулан, нэр төрлийг олшруулснаар төрийн худалдан авах системд оруулах боломж байгаа гэв. Өнөөдрийн хэлэлцүүлгийг Монгол Улсын Ерөнхийлөгч, УИХ болон Монгол Улсын Засгийн газраас “Эх оронч худалдан авалт” буюу төрийн худалдан авалтыг дээд хэмжээгээр нэмэгдүүлэхэд онцгой анхаарч буй хүрээнд зохион байгуулж буйг онцоллоо.  

“Хүнсний хувьсгал” хөдөлгөөний хүрээнд төрийн худалдан авах ажиллагаанд хичнээн компани, ААН оролцохор байгааг ТХААГ-ын дарга Ц.Батзулаас тодруулбал, “Хүнсний салбарын хүрээнд төрийн худалдан авалт боловсролын байгууллагууд буюу сургууль, цэцэрлэгийн “Үдийн цай” хөтөлбөрийн хангалт, эрүүл мэндийн байгууллагуудад өвчтөн, эмч, ажилтнууды хоол хүнс, мөн тусгай чиг үүргийн байгууллагууд буюу БХЯ, Хилийн цэрэг, ШШГЕГ, ОБЕГ өөрсдийн шаардлагатай байдаг хүнсний бүтээгдэхүүнийг дотоодоос нийлүүлж байна” гэв.

Тендер шалгаруулалтын дүнг олон нийт нийт төсвөөр дүгнэн их хэмжээний мөнгө гарч байна гэж үздэг бол төсөв батлахад бодит санхүүжилт хамаагүй бага дүнгээр гардгийг тэрбээр хэлж байлаа. Хүнсний салбар дахь төрийн худаллдан авалт-нийлүүлэлтийн тендерийг импортын хүнсний бүтээгдэхүүнийг дотоодын, үндэсний үйлдвэрлэгчдийн хүнсээр сольж орлуулья гэсэн зорилгоор зарлаж байна. Мах гэхэд дотоодын ЖДҮ эрхлэгч ААН-үүдээр хангуулах, ингэхдээ хагас болон бэлэн боловсруулсан мах нийлүүлэх шаардлага тавьж байна гэв.

Хэлэлцүүлэгт оролцсон үндэсний үйлдвэрлэгч нар төрийн худалдан авалтад дотоодоос нийлүүлэх бараа, бүтээгдэхүүн, үйлчилгээг захиалагч төрийн байгууллагууд ханган нийлүүлэгчдээс тус тусад нь багцлан авч байх хуулиа хэрэгжүүлж ажиллахыг сануулж байлаа.

Энэ нь төрийн өмчит үйлдвэрийн газрууд гэхээсээ илүү ихэвчлэн төрийн өмчид компаниудад гарч буйг хүнсний тоног төхөөрөмж үйлдвэрлэлийн “Чиглэл” ХХК-ийн захирал Н.Бумцэнд хэлж байв. Эднийх импортын стандарт бус хуванцар савыг оруулах үүднээс дотооддоо, сургууль, цэцэрлэгийн гал тогооны тоног төхөөрөмж, сав суулга нийлүүлж байгаа аж.

Үндэсний үйлдвэрлэгч нар өөр өөрийн бараа, бүтээгдэхүүн, үйлчилгээгээ ханган нийлүүлэлтийн платформ болох “Цахим дэлгүүр”-т байршуулах юм бол та бүхний зах зээл тэр хэмжээгээр өргөжнө гэдгийг ТХААГ-ын Цахим худалдан авах ажиллагааны мэдээлэл, технологийн хэлстийн дарга Н.Цэрэнсамбуу хэлэлцүүлгийн үеэр тайлбарлав.

“Цахим дэлгүүр”-т одоогийн байдлаар мах, хүнсний ногооны захиалгын мэдээлэл тавигдаад буйг танилцуулж, дараагийн ээлжинд гал тогооны сэлбэг хэрэгсэл, оёмол бүтээгдэхүүн, зөөлөн эдлэл, хөдөлмөр хамгааллын хувцасны захиалга болон нийлүүлэлтийн мэдээллийг үе шаттай оруулахаар ажиллаж буйг тэрбээр мэдээллээ. Мөн сав, баглаа боодлын тендер шалгаруулалтын мэдээллийг энэ онд багтаан оруулахаар бэлтгэж байна гэв.

"Үндэсний үйлдвэрлэлийг төрийн худалдан авах ажиллагаагаар дэмжих нь" нээлттэй хэлэлцүүлэг, сургалтад ХХААХҮЯ, БШУЯ, Сангийн яам, ЭМЯ-ны албаны холбогдох хүмүүс, төрийн зүгээс төрийн өмчийн томоохон худалдан авагч “Эрдэнэт үйлдвэр” ТӨҮГ, “Эрдэнэс Тавантолгой”, “Тавантолгой түлш”, УБТЗ, ДЦС-III зэрэг томоохон ААН, компанийн төлөөлөл, хангамжийн хэлтсийн удирдлагууд оролцлоо.