"Хөгжлийн банк"-ны гэх 80 хүн, 4 хуулийн этгээдэд холбогдох эрүүгийн хэргийн гэм буруугийн шүүх хуралдаан 14 дахь өдрөө үргэлжилж байна.

“Пирамид орд” ХХК “Бум залуус” 296 айлын орон сууцны хорооллын төслөөр Монгол Улсын Хөгжлийн банкнаас 2017 онд нийт 15 тэрбум төгрөгийг жилд 13.44 хүүтэйгээр төгрөгийн зээл олгосон. 2022 оны арванхоёрдугаар сарын 31-ний өдрийн байдлаар үндсэн зээлээс төлөлт хийгээгүй байна.

Пирамид орд ХХК-ийн захирал Г.Цолмон Шинжээчийн дүгнэлтээр 6,9 тэрбум төгрөг зориулалтын бусаар зарцуулагдсан гэж үзэж мөнгө угаасан гэмт хэрэгт буруутгагдан яллагдагчаар татагджээ.

Хөгжлийн банкнаас зээл авахаас өмнө өр төлбөртэй байсан, зээлээ төлөөгүй байсан хэр нь өр төлбөргүй гэсэн бичиг гаргуулж зээл авсан байна. Баригдсан, барьцаанд байгаа орон сууцнаас төлбөр авахаар тохирсон ч аваагүй, шүүх дээр хэрэг хэлэлцэгдэж байгаа аж. Зээл олгох үед барьцаа хөрөнгө 10.6 тэрбум төгрөгийн үнэлгээтэй байжээ. Ажлын магадлагаа буюу 2022 оны хоёрдугаар сарын 28-ны газар дээрх үзлэгээр төсөл ашиглалтад ороод 21.8 тэрбум төгрөгийн үнэлгээтэй байна гэж гарсан байна.

Өмгөөлөгч "Барилгын жижиг компани Хөгжлийн банкнаас 15 тэрбум төгрөгийн зээл авна гэдэг гайхамшигтай. Банкнаас ямар нэгэн нөлөөгүйгээр, хэрхэн зээл авах боломжтой байдаг вэ" хэмээн асуухад “Пирамид Орд” ХХК-ийн Захирал Г.Цолмон "Зээлийн шаардлагыг хангаж, бүх зүйл ном журмынхаа дагуу явагдсан. Заавал хууль бус үйл ажиллагаа байсан мэт бодох хэрэггүй" гэлээ.

Барилга хот байгуулалтын Дэд Сайд асан Г.Байгалмаа "Баримт бичиг хуурамчаар үйлдсэн" хэрэгт буруутгагджээ.

Прокурор "Та өөрийнхөө гарын үсгийг биш өөр хүний гарын үсгийг дуурайлган зурсан байна шүү дээ. Мөн таны нэр дээр 37 орон сууц шилжсэн гэсэн мэдээлэл байна" хэмээлээ.

Дэд Сайд асан Г.Байгалмаа тайлбартаа:
- 2015 оны 03-р сарын 1-ний өдрийн удирдах зөвлөлийн 04 тоот тогтоолыг үндэслэж зурсан. Энэ нь орон сууц бариулах, газар эзэмших эрх шилжүүлэх тогтоолыг хамтын шийдвэрээр, олон гишүүд нийлж албажуулж гаргасан. Тухайн үед газар шилжүүлэх эрхийг нь "Пирамид орд" ХХК-д өгсөн гэдгээ протоколтой, гэрчилгээтэй нь өгсөн. Г.Цолмон захирлын хэлж буйгаар заавал даргын гарын үсэгтэй гэхэд нь тэр боломжгүй гэдгээ хэлсэн. Шийдвэр гаргахад дарга оролцож байсан учраас би тухайн үед зурсан юм.

Хөгжлийн банканд шаардагдах материалыг л бүрдүүлж өгсөн. 37 байр уу, 20 байр байна уу би өөрийн нэр дээр болон хамаатан саданд шилжүүлж авсан зүйл байхгүй.

Харин прокурор, "Пирамид Орд ХХК-тай хийсэн гэрээний дагуу зарим орон сууцны урьдчилгаа таны данс руу орж байсан юм билээ. Төрсөн эцэг эх тань бас байранд орсон, амьдарч байгаа" гэхэд Г.Байгалмаагийн өмгөөлөгч гэм буруутай нь нотлогдоогүй зүйл ярьж байна хэмээн эсэргүүцсэн ч Г.Байгалмаа тайлбар хэлэхийг хүсэв.

Тэрбээр "Би гэрээ хийж урьдчилгааны мөнгө аваагүй. Хүүгүй лизинг өгсөн гэж Г.Цолмон захирал хэллээ. 2020 оны 4 дүгээр сараас эхлэн хоёр жилийн хугацаанд 325 мянгаас 1 сая төгрөгийн түрээс сар бүр орсоор 220 сая төгрөг болж цугларсныг гурван ширхэг 1 өрөө орон сууц худалдаж авсан байдаг. Мөн нэр бүхий барьцаагаа оруулаад 2020 онд таван орон сууц авсан. Миний эцэг эх тэнд амьдарч байгаа нь үнэн, худалдаж авах гээд дансанд мөнгө байршуулсан нотолгоо нь ч бий" гэлээ.