Авлигатай тэмцэх газар, Эрүүгийн цагдаагийн алба, Мөрдөн байцаах албаны хамтарсан Ажлын баг ногоон автобусны гэх хэргийг шалгаж байгаа бөгөөд Тэнүүн-Огоо ХХК-ийн дээрх удирдлагууд болон Нийслэлийн худалдан авах ажиллагааны газрын "Т" болон "Б" нарын дөрвөн хүнийг энэ сарын 2-нд түр саатуулсан. Эдгээр дөрвөн хүний гурвыг нь үргэлжлүүлэн хорих, нэг хүнд хязгаарлалт тогтоох саналыг нийслэлийн прокурорын байгууллагаас шүүхэд ирүүлсэн байна.

БНСУ-ын "Zyle Daewoo Bus" компаниас 600 ширхэг дизель хөдөлгүүртэй нийтийн тээврийн автобусыг худалдан авахдаа хуучин автобус авсан гэх асуудал олон нийтийн шүүмжлэлийг дагуулж, анхаарлын төвд ороод байгаа. Уг автобуснуудыг худалдан авах тендерт "Тэнүүн-Огоо" ХХК шалгарч, импортолсон юм. Улсын төсвийн хөрөнгөөр буюу 600 ширхэг ногоон автобусыг нэг бүрийг нь 336 сая төгрөгөөр "ZYLE Daewoo" компаниас худалдаж авчээ.