Засгийн газрын өнөөдрийн ээлжит хуралдаан үргэлжилж байна. Хуралдаанаар, зарим албан тушаалтныг чөлөөлж, томилох асуудлыг хэлэлцэн шийдвэрлэж байна. Тухайлбал, ГХЯ-ны Төрийн нарийн бичгийн дарга Н.Анхбаярыг үүрэгт ажлаас нь чөлөөлөв. 

Улмаар түүнийг НҮБ-ын байнгын төлөөлөгчөөр томилохыг Засгийн газрын хуралдаанаар дэмжлээ. Энэхүү томилгоог Засгийн газар УИХ-д танилцуулах сонсгол явуулах юм байна. 

 Н.Анхбаяр нь хуульч, эрхзүйч мэргэжилтэй, Шинэ Зеланд Улсыэ Веллингтон хотын Виктория их сургуулийн хууль зүйн ухааны магистр бөгөөд 2000 онд УИХ-ын Тамгын газрын туслах ажилтан, 2003 онд УИХ дахь МАХН-ын бүлгийн ажлын албаны референт, 2007 оноос Гадаад харилцааны яамны мэргэжилтэн, атташе, газрын дэд захирал, Ерөнхий консул, хэлтсийн дарга зэрэг өндөр албан тушаалыг хашиж байсан юм. Тэрээр УИХ-ын гишүүн, Хууль зүйн сайд асан Ц.Нямдоржийн хүү гэдгээр нь олон нийт сайн мэддэг билээ.