Хүүхдийн мөнгөн тэтгэмжийг энэ сарын 20-ноос үргэлжлүүлэн авах боломжтой иргэдийн гар утсанд зурвас илгээж мэдэгдээд байгаа.

Харамсалтай нь 3.5 саяас бага орлоготой өрхийн хүүхэд хасагдсан, зарим хүүхдийг огт бүртгээгүй, эд хөрөнгийн бүртгэлийн болон орлогын мэдээлэл буруу гарч ирсэн, e-mongolia.mn, ehalamj.mn сайтын хандалтаас үүдэн мэдээлэл авч чадахгүй байгаа гомдолд ХНХЯ, ҮСХ, ЦХХХЯ-ны төлөөлөл хариу өгч, мэдээлэл хийв.

ХНХЯ-ны Бодлого төлөвлөлтийн газрын дарга А.Хишигбаяр, "Манай улс ҮСХ, ТЕГ, НДЕГ, АТҮТ, УБЕГ-ын мэдээллийг анх удаа багцалсны үндсэн дээр 12 үзүүлэлтээр өрхөө үнэлсэн. Мэдээлэл зөрсөн бол төр, иргэн хамтарч үнэн бодит болгон засаж залруулна. Ам бүлийн мэдээлэл зөрвөл баг, хороон дээр, машин нэмэгдсэн байвал АТҮТ-д очиж мэдээллээ зассаны дараа хүсэлт гаргана. E-Mognolia, ehalamj.mn рүү орж хүсэлтээ өгөхөөс гадна өөрийн биеэр очиж болно. Төр хувь хүний мэдээлийг иргэний зөвшөөрөлгүй засах боломжгүй тул иргэдтэй хамтраад мэдээллээ зөв болгонж хүүхдийн мөнгөө нөхөж олгох зохицуулалт хийж байна” гэлээ.

Хүүхэдтэй хүн хүүхэдгүй гэж гарч ирсэн, хүүхдийн тоо зөрсөн тухайд ҮСХ-ны дэд дарга Д.Лхамсүрэн тайлбарлахдаа, -Тухайн иргэн өмнө оршин сууж байсан байраа зарахдаа бүртгэлээ хасуулаагүй байж болзошгүй. Мөн хүүхдээ сургууль, цэцэрлэгт ойр байрлалаас явуулахын тулд өвөө эмээ дээрээ өрхийн гишүүн гээд явж байгаа шалтгаанаас алдаа гарсныг үгүйсгэхгүй. Иймд баг хороон дээрээ очиж засуулах нь зүйтэй хэмээв.

ЦХХХЯ-ны Бодлогын хэрэгжилтийг зохицуулах газрын дарга Б.Билэгдэмбэрэл ярихдаа, Ихэнх иргэн мэдээллээ шалгаснаар emongolia, ehalamj.mn хандалт нэмэгдсэн. Энгийн үед 1 минутад 90 мянга орчим хандалт байдаг бол өчигдөр оргил үедээ 10-15 дахин нэмэгдсэн. Ачаалал 5 дахин нэмэгдэхэд бэлэн байсан учир интеграц хийхээс аргагүй болж системийн өргөтгөл хийж байна. Эдгээр сайт руу хандсан хүсэлтийг 5 байгууллага руу явуулж, хариу өгнө. Иргэдийн хүсэлтийг хүлээн авсны үндсэн дээр мэдээллийн зөрүүг засах боломжтой хэмээсэн юм.

Хүүхдийн мөнгийг зорилтот бүлэгт олгох аргачлалыг төрийн 10 байгууллага, Дэлхийн банк хамтран боловсруулсан байна. Дэлхийн 40 гаруй улс оронд ашигладаг, зорилтот бүлгийг тодорхойлох аргыг ашиглан, орлого, хөрөнгийн мэдээлэлд үндэслэн өрхийн аж байдлын үнэлгээ хийснээр зорилтот бүлэг 91 хувь гэж гаргажээ.

Хүүхдийн мөнгийг халамжийн үйлчилгээ болгож зорилтот бүлэгт чиглүүлэх зорилгоор УИХ-аас “Нийгмийн халамжийн тухай хуульд нэмэлт оруулах тухай” хуулийг 2022 оны 11 дүгээр сарын 11-нд баталсан. Монгол Улсын 2023 оны Төсвийн тухай хуульд хүүхдийн мөнгийг 1139.2 мянган хүүхэд буюу нийт хүүхдийн 91 хувьд 100 мянган төгрөгөөр үргэлжлүүлэн олгохоор тооцон 1367.0 тэрбум төгрөг баталсан байна. Монгол Улсад 970 мянга гаруй өрх, 1 сая 260 мянган хүүхэд бий. 0-18 насны хүүхэдтэй 568 мянган өрх байгаагаас 78 мянган өрхийн 113 мянган хүүхэд 9 хувьд орж хасагдана. Хүүхдийн мөнгөн халамжид жилд 118 тэрбум төгрөг баталжээ.