“Альфабүүк” номын дэлгүүрээс 40 сая төгрөгийн шагналын сантай “Өглөөний уншлага” үндэсний хэмжээний хөтөлбөр зарлажээ.  Тус хөтөлбөрийг өнгөрсөн 2022 оны арваннэгдүгээр сард зарласан бөгөөд ерөнхий боловсролын сургуулийн сурагчид ангиараа хамрагдах боломжтойгоороо онцлог аж. Өнөөдрийн байдлаар “Өглөөний уншлага” хөтөлбөрт нийт 4500 ангийн 150 мянга орчим сурагч бүртгүүлжээ. Бүртгүүлсэн сурагчид хичээл эхлэхийн өмнөх 10-15 минут ангиараа ном уншиж байгаа юм.

“Өглөөний уншлага” хөтөлбөр хэрэгжсэнээр,

• Хүүхдүүд дэлгэцийн хамааралтай биш ном унших дадалтай болж төлөвших,
• Өөрийн насны онцлогт тохирсон номуудыг унших,
• Алдаатай бичихээ болих зэрэг эерэг үр дүн гарахыг зохион байгуулагчдын зүгээс онцолж байна.

"Өглөөний уншлага" - д бүртгүүлсэн сурагчид тус хөтөлбөрийн талаар "Сургуулийн орчин дахь дээрэлхэлт, боловсролын тэгш бус байдлаас үүдэлтэй ялгаа, зохисгүй цахим хэрэглээ, хүүхдийн сэтгэл гутралын гээд олон асуудлыг эсрэг маш энгийн гаргалгааг "Өглөөний уншлага" хийж чадна гэдэгт итгэлтэй байгаа" хэмээн хэвлэлд өгсөн ярилцлагадаа дурджээ. 

Энэ төрлийн хөтөлбөрийг өмнө нь хэрэгжүүлж байсан сайн туршлагуудаас сонирхуулахад, 1988 онд Японы нэгэн тосгоны охидын сургуулийн хоёр багш “Өглөө болгон 10 минут бүх ангиараа ном уншвал ямар вэ” гэж ярилцаж, шийдсэний үндсэн дээр туршиж үзжээ. Уг туршилт хурдацтай тархаж, тус сургуулийн бүх анги өглөөний уншлагын цагтай болж, хүүхэд бүрийн цүнхэнд ном байдаг болжээ. Улмаар Япон даяар уг төсөл хэрэгжиж, тус улсын дийлэнх нь буюу 3500 орчим сургууль нэгдэж, өглөө бүр 10 минутыг зөвхөн ном уншихад зарцуулж эхэлсэн аж. Мөн уг хөтөлбөрийг хэрэгжүүлэхэд туслах зорилгоор ном бүтээгч, хэвлэлийн газрууд хүүхэд цүнхлээд явахад хялбар, бага хэмжээтэй ном хэвлэж болж, Японы Засгийн газраас XXI зууны боловсролын хөгжүүлэх хөтөлбөртөө багтааж, 100 тэрбум иен төсөвлөсөн байдаг.

Тэгвэл уг үр дүнтэй хөтөлбөрийг Монгол “Альфабүүк” номын дэлгүүрээс хэрэгжүүлж, уран зохиолын хичээлийг илүүтэй сэргээж, хүүхдүүдийн номтой нөхөрлөхөд нь туслах зорилготой аж. “Өглөөний уншлага” хөтөлбөрт доорх линк дээр даран бүртгүүлэх боломжтой юм байна.

Бүртгүүлэх холбоос: https://docs.google.com/forms/d/e/1FAIpQLSde5p-e-u2ISAh0QB5e94oR5NSWcm2mBBszVFjTbicxJWnayw/viewform

Хөтөлбөр 2023 оны тавдугаар сарын 1-нд дуусах бөгөөд идэвхтэй, тууштай, бүтээлч байдлаар оролцсон багш болон сурагчдыг дараах байдлаар шагнаж урамшуулах аж.

Бага анги:

1. Ангийн хүүхэд тус бүрт 100,000 төгрөгийн ном, анги удирдсан багшид 2,000,000 төгрөг
2. Ангийн хүүхэд тус бүрт 80,000 төгрөгийн ном, анги удирдсан багшид 1,500,000 төгрөг
3. Ангийн хүүхэд тус бүрт 50,000 төгрөгийн ном, анги удирдсан багшид 1,000,000 төгрөг

Дунд анги :

1. Ангийн хүүхэд тус бүрт 100,000 төгрөгийн ном, анги удирдсан багшид 2,000,000 төгрөг
2. Ангийн хүүхэд тус бүрт 80,000 төгрөгийн ном, анги удирдсан багшид 1,500,000 төгрөг
3. Ангийн хүүхэд тус бүрт 50,000 төгрөгийн ном, анги удирдсан багшид 1,000,000 төгрөг

Ахлах анги :

1. Ангийн хүүхэд тус бүрт 100,000 төгрөгийн ном, анги удирдсан багшид 2,000,000 төгрөг
2. Ангийн хүүхэд тус бүрт 80,000 төгрөгийн ном, анги удирдсан багшид 1,500,000 төгрөг
3. Ангийн хүүхэд тус бүрт 50,000 төгрөгийн ном, анги удирдсан багшид 1,000,000 төгрөг.

Мөн нийгмийн хариуцлагынхаа хүрээнд, ирээдүй, хойч үедээ хөрөнгө оруулахаар зорьж байгаа иргэн, аж ахуйн нэгжүүд “Өглөөний уншлага” хөтөлбөрт хамрагдаж байгаа нийслэлийн захын дүүргийн болон орон нутгийн сургуулийн номын санг тохижуулах, ивээн тэтгэгчийн нэрэмжит ангийг шалгаруулах боломжтой юм байна.