УИХ-ын нэгдсэн чуулганы өнөөдрийн хуралдаанаар Төрөөс мөнгөний бодлогын талаар баримтлах үндсэн чиглэлийг хэлэлцэж байна.

Энэ үеэр УИХ-ын гишүүн Ц.Тувааны хэлсэн мөнгө хэвлэх тухай санал хэлсэн нь анхаарал татаж байна. 

Тэрбээр "Хөдөө орон нутгаар явахаар иргэд маш бухимдалтай байна. Учир нь малаа нядлаад борлуулах гэхээр авдаг хүн алга, мөнгө байхгүй. Тариаланчид тариа будаагаа, ногоочид ногоогоо, хадланчид тэжээлээ борлуулах гэхээр дандаа бартер ярьж байна. 

Эдийн засгийг гол явуулж байдаг мөнгөний урсгал алга, мөнгө нүхэнд ороод алга болчхож. Иймд Монголбанкныхан байгаа дээр нь асууя, бодлогын хүүгээ ингэж өндөрсгөөд, зээл царцаагаад, мөнгө хөдлөхгүй байхад хүмүүс бүтээсэн зүйлсээ юугаар борлуулж, хэрэгцээгээ хангах мөнгөө хаанаас олж авах вэ. Бодлогын хүүгээ хэзээ бууруулах вэ? 

Орон нутагт амьдарч байгаа хүмүүс мөнгөгүйдлээ шийдэхийн тулд зээлээр л явж байгаа. Зарим аймагт, ялангуяа зүүн тал руу зээл, зээр хоёроор л амьдарч байна гэдэг болсон.

Зээлийн хүү өндөр, олдохоо больсон. Банкнаас зээл гарахаа больж, банк бусууд ачааллаа бараг даахгүй байгаа байх. Одоо аппликэйшний зээл руу орчихсон. Тэгэхээр Монголбанк аппликэйшний зээлд хэдэн төгрөг эргэлдэж байгаа вэ, та нарт тоо бий юу? Зарим хүн 2.9 их наяд төгрөг гэсэн тоог надад хэлж байгаа. Мөнгөний бодлого барьж байгаагийн хувьд та нар хэмжээ, хүүг нь хэлээд өгөөч.

Хоёрдугаарт ипотекийн эх үүсвэр 600 тэрбум төгрөг гэж байгаа нь хүүгийн орлогоос нь орж ирдэг мөнгө. Барилгын үнэ өндөр болсон, нэг айлд 150 сая төгрөгийг зээллээ гэж бодоход ердөө 4,000 хүний хэрэгцээ. Ипотек бол арын хаалганы хэрэгсэл болсон. Олдохгүй байгаа. Эх үүсвэр талдаа улсын төв банк байна даа, нэг бодлого явуулаа нэмэгдүүлж болохгүй юу" гэв.

УИХ-ын гишүүн Ажлын хэсгийн ахлагч М.Ундрам "Эх үүсвэрийг нэмэгдүүлье гэвэл мөнгө хэвлэхээс өөр аргагүй болно. Мөнгө хэвлэбэл инфляц нэмэгдэж, иргэдийн амьдрал хэцүү болно. Тиймээс өнөөдөр эргэн төлөлтөөр нь зохицуулъя гэж байгаа юм" гэлээ.